السلام عليكم ورحمة الله وبركاته
اجواء صيفيه حاره ولله الحمد .. سافرنا وخلصنا ولله الحمد .. شاليهات ورحنا .. شنو نسوي في هالصيف عشان يقزر ؟؟
عندنا تسع جزر جميله بس للاسف مو مستقله الاستقلال الصحيح ياليت ينتبهون لها شركة المشروعات السياحيه شوي ويهتمون فيها ويخلونها وجهة من لا وجهة له في الديره يعني اللي مايقدر يسافر او سافر وخلص ليش مايخلون جم جزيره سياحيه على اسس وقواعد صحيحه مثل منتزه الخيران بس على جزيره المالديف احسن منا بشنو ؟؟ ترا ماعندهم الا جزر الحمدالله ربي لك الحمد الخير موجود والعقول موجوده بس باقي التنفيذ لنعقلها ونتوكل ياجماعه
المهم مابي اطولها عليكم اتفقنا انا وجم واحد من الربع ان نطق لنا فره على جم جزيره يم بعض واهم جزيرة مسجان وجزيرة عوهه وجزيرة فيلجا وبما انهم قريبين من بعض مرينا مرور الكرام على جزيرة مسجان وكملنا طريجنا حق جزيرة عوهه وقلنا واحنا رادين الديره نمر فيلجا شوي نتغدى فيها ونرجع للديره
تحركنا من صوب سوق شرق
وانطلق بنا النوخذه بن داليا الى وسط البحر بسرعة 55 كيلو متر بالساعه مادري جم بالميل البحري انا معاي القارمن واهو قاعد يحسب السرعه
الحبيب شكله وده يقحص بس مو عارف
المهم مشينا ومشينا قرابة الساعه الا ربع ومرينا على جزيرة مسجان سلمنا عليها وكملنا طريجنا لين وصلنا جزيرة عوهه
شاطئ عوهه الجميل
ونزلنا اغراضنا وقعدنا شوي تمشينا بالجزيره نشوف شفيها مافيها
مافيها الا هالجبره والغرفه الصغيره اللي مناك والشجره وبرج حديدي بوسط الجزيره
يبيلنا نستظل تحت هالشجره من حرارة الشمس
بحرنا جميل
طراد توّه واصل للجزيره
هذا صيدنا يومها وايد على الربع وينهم ووين الحداق
خل نلعب كره في البحر احسن بس
شدعوه بتعطي الخطه اللي بتوصلنا كاس العالم الحين
جنه عنجكك هذا اللي في البحر
وبعد ماسبحنا وخلصنا واستانسنا ولله الحمد نشيل قشنا ونروح فيلجا
ياعمري ياالطراد ابد مايفرق عن تايتنك بشي بس هذا اصغر منه بشي بسيط والا ماكو فرق ترا
يالله اسحب رفيجك خل نمشي بس دير بالك لايزحف على الطراد
ووصلنا الى ضفاف جزيرة فيلجا .. هذه الجزيره العريقه واللي حاب يعرف عنها اكثر يضغط هنــي
ما أجمل شواطيكي الجميله يافيلكا
واقتربنا اكثر فاكثر ... الى ان وطئت قدماي أرض فيلكا .. كانت اول زياره لي لجزيرة فيلكا قبل 30 سنه بالضبط يعني قبل الغزو ولم ازرها من بعد ذاك التاريخ الى ان وطئت قدماي ارض الجزيره من جديد في هذه السنه 2011
وانتشروا الربع كل واحد بصوب يتلفتون يمينا وشمالا ينظرون الى هذه الجزيره التي هجرها اهلها منذ عام 1990 بسبب الغزو العراقي على الكويت
خلونا نشوف الحين بعض فلل وبيوت جزيرة فيلكا القديمه المهجوره ونروح حق المطعم اللي بنتغدى فيه بعد ماصكنا اليوع
هذي فلتهم .. فيلا منو ماندري بس مكتوب على الطوفه هذي فلتنا
الحبيب ضيع حسباله بيتهم .. تعال يالطيب مو هذا بيتكم
وين مودّي التانكي ؟؟ يقولون صارله مدّه حاط التانكي فوق السوبر ومخليه
حتى هناك على طوف فيلجا تكتبون البي بي أم مالكم ماكو الا الينانوه هناك الله يكافينا الشر وياكم
اووووه صبي موجود بالجزيره شلونك يالطيب ... شدعوه اردفني وياك احقر يالطيب
خفف تكفه دير بالك يهال
انا بس ودي اعرف اهو فيها احد الاوادم اللي تقول تكفه ؟؟
شاك بيرجر ؟؟
يبيله والله يفتح هناك شيك شاك والله يقوم سوقه ماشاءالله
يالله ان شاءالله اذا طوروا الجزيره نشوف شيك شاك هناك
واخيرا وصلنا لمطعم الجزيره ... آآآآخ يا اليوع
ياسلام على الدياي والعيش الابيض
لازم بو ديج موجود
من الحر اللي طقهم مالهم خلق ياكلون ماتاكلون يايبا
يالطيب حدك مو أكيّل ماتنظف الصحن شناطر يالحبيب
وبعد ماخلصنا اكلنا ولله الحمد رحنا ننطر دريولنا على الطراد
كاهو وصل وصل
ومن ثم ركبنا طرادنا وعدنا الى الديره بعد قضاء يوم جميل في جزيرتي عوهه وفيلكا على امل العوده مرة اخرى واخرى واخرى ان شاءالله
فمان الله فيلجا واشوفج على خير ان شاءالله
والحين بوريكم فيديو لتطوير جزيرة فيلكا واللي ان شاءالله نشوف هالشي في اسرع وقت ممكن
لمشاهدة فيديو تطوير الجزيره اضغطوا هنــي
تعليقات
إرسال تعليق